Isang sagot sa lahat ng mga katanungan

Fanaticism is the only way to put an end to the doubts that constantly trouble the human soul
-Coelho in The Zahir

Napakadaming relihiyon sa mundo; at napakaraming tao ang sa bawat isa ay sunud-sunuran o kahit papaano ay may pananampalataya.
Ang ganitong ‘setup’ ay hindi nakapagtataka. Kung hindi kasi ganito, baka tayo’y nabaliw na. Ang kamangmangan natin sa libu-libong mga bagay ay maaaring kainin tayo ng buhay kung hindi natin sila bibigyan ng kasagutan sa pamamagitan ng paniniwala sa isang bagay o tao na higit sa atin.
Mapag-isip ang sangkatauhan at lubos na kailangan niya ng katwiran sa kung bakit tayo ay mayroong buhay; kung bakit tayo’y naririto ngayon.
Sa pamamagitan ng paniniwala at pagtitiwala na mayroong Manlilikha na siyang nagbigay buhay sa atin, nagkakaroon ng kasagutan ang mga katanungang tulad ng: Bakit ako nasa mundong ibabaw? May halaga ba ako? Ano ba ang mangyayari sa aking kamatayan?
Ang pagresolba sa pamamagitan ng pananampalataya ang pinakamadaling gawin. Lahat ng mga bumabagabag sa ating isipan ay sa pananampalataya, may tiyak na kasagutan.
…
Aking aaminin na hindi ako isang relihoyosong tao. Hindi ako nagsisimba, nakalilimutan kong magdasal, at hindi man lamang ako nagbibigay galang sa simbahan kung ito ay aking madadaanan. Ganun pa man, ako ay may pananampalataya.
Naniniwala ako na mayroong Diyos at naniniwala rin ako na hindi ko ito kailangang ipanakikita sa pamamagitan ng pagsunod sa mga ipinataw ng simbahan na nararapat gawin ng isang katoliko. Ang simbahan, hindi nga ba, ay pinatatakbo lamang ng pawang mga tao.
…
Naisip ko lamang: paano kung ang lahat pala ng mga relihiyon ay pawang peke?
Sa totoo lamang, ngayon ay wala na akong pakialam. Mapatunuyan mang peke nga ang mga ito ay maniniwala pa rin ako na may Diyos at maninindigan pa rin ako sa kanya.
]Isang masyadong nakatatakot na bagay kasi ang mawalan ng paniniwalaan, ng isang sandigan na lagi mong maaasahahan.

Nakangingilabot ang maniwala na walang Diyos; ang kawalan nito ay nangangahulugan na ang tao ay isa lamang hayop. Isang hayop na nagkataon lamang na nakapag-evolve. Hindi siya espesyal at walang katuturan ang buhay.